كلمني عني.مسابقة الشعر العامى بقلم / رحاب فكري طاهر

كلمني عني

كلمني عني..
خليني اشوف نفسي في مرايتك
اسمحلي اكون بطلة حكايتك
كلمني عني..
سمعني صوتي من بين حروفك
نورني ضيّ ساكن في جوفك
كلمني عني..
اوصفلي عيني وشامة جبيني
وقف زماني, احسب سنيني
كانوا كام سنة؟
بقوا كام هَنا..
كلمني عني..
اكتبني جوا عينيك صفا
البسني على بردك دفا
اجبرني على وجعك وفا..
احكيلي عني..
اوصفني ليَ..
قول قد ايه حلوة في عيونك
خبيني جوا أمان جفونك
كلمني عني..
قول قد ايه عاجباك خدودي
غنيلي إن السحر عودي
احكيلي تاني..
لما بتحكي باعشق وجودي
كلمني عني..
كلمني عنا..
ارسمني طير بجناح ملاك
غَرَّد أمل في يوم لُقاك
سكِّني قلبك بنعِيمُه جَنّة
كلمني عني..
كلمني تاني..
واحكيلك إني..
ضاع عمري مني
لما لقيتك..حبيت سنيني
احكيلي تاني
احكيلي عني..

بقلم: رحاب فكري