خاص بمسابقة مهرجان همسه الدولي 2018
شعر عامي
الاسم / طه ابراهيم سيد
البلد / مصر / القليوبية
كلمه ف يوم الحق تشفعلك
@@@@@@@@@@
يغور الشعر لو كان القلم مأجور
ويدهلس ويتمحلس لأهل الزور
ويتنطط ويتشقلب كما الحاوي
تقول ساحر تقول مسحور
تقول ماشي بيتمرغ علي دماغه
ولا حاسس ولا شايف شعاع النور
يقول الكلمه متباعه ومقلوبه
يقول كلمه عشان يوصل لسبوبه
يغور الشعر وسنينه كمان نوبه
يقول الكلمه مبتوره من الاحساس
ويتجمل عشان ياكل عقول الناس
يغور الشعر وسنينه متين مره
تغور كلمه ماهيش عايزه تكون حره
يغور الشعر وسنينه من الاخر
تبيع نفسك عشان تاخد لقب شاعر
وبعد الشهره يا معلم هتعمل إيه
هتبقي الشاعر الواعد معالي البيه
ومين شالك ومين حطك ف نن عينيه
عشان تاخد لقب شاعر تبوس رجليه
مدام الكلمه متاهنه هتفرق إيه
يغور الشعر وسنينه يا عم البيه
ومين تاني ومين بكره هيسمعلك
ومين تاني ف دنيا الشعر أنفعلك
ومين خانك ومين خنته ومين بعلك
ومين تاني ف يوم الحق يشفعلك
ويتألم ويتوجع عشان حالك
ياريت تمسك يا استاذنا علي لسانك
وقول كلمه تكون خالصه لوجه الله
هتفضل بكره ف رصيدك وتبقي حياه
واهي كلمه ورا كلمه هترجعلك
وتبقي الحجه ف ميزانك
وتبقي …… هدية ….. جيالك
اهي كلمه ولا خطرت علي بالك
ف يوم الحق يا حبيبي تشفعلك
@@@@@@@@@@@
بقلم //// طه إبراهيم سيد
