لاجل انتظار طعم اللقا . مسابقة الشعر العامى بقلم / بهاء محمد عبده من مصر

قسم / الشعر عامي

لاجل انتظار طعم اللقا

صب الدفا
افرد جناحك يانهار
اصل القمر
خاصم عيون حضن السحاب
رافض مكانه ف السما
لوحه بترسمها السنين
يابحر فين
شط النجوم
تاهت مراكب رحلتك
جفف دموعك يانسيم
بطل تمد جوه الوريد
طعم اللقا
لساك بتروي ف زرعتين
ماتوا بصبرك ع الجراح
قلبك ده شاخ
راكن بعكاز الاهات
اكمنه بات
جوه ساحات الانتظار
اطلق سراح نفسك
عشان تقدر تعيش
قيس البراح قبل الاوان
الضيق يهل
اوعاك تمل
او حتى تسمح بالرجوع
ثبت خُطاك
شُق بإيديك سور الضلام
افتح زنازينك بقى
اطلع وعد
كام حلم فات
لاجل انتظار
طعم اللقا
بطل تأن
صوت الانين
راسم ملامحك شخبطه
الليل بيسرق ضحكتك
ناوي يلتملك نهار
يكسر جدار
النور ف عتمة سكتك
سجل حضور
قبل انتهاء وقت السماح
عافر بقى
فك الحبال
اقطع ف شريان الجراح
لملم ف شريان الحياه
ازرع امل على ارض بور
ترسم ايديك شكل الخضار
كرمش ف احزانك وقوم
ارمي وراك الانتظار