شعر عامية
الشاعر / محمد طه شلبى
مصر- المنصورة – دقهلية
ما بدري …
كل يوم,
بحاول اسرق حبة حنان,
من جيب ابويا اللى مات
من عشر سنين
عارفه…
امبارح لما كنتى بتندهى عليّا
وانا مردتش
كان قاعد معايا
كان واخدنى ف حضنه
بيضمنى بشده
سألنى عنك
عن الولاد
عن حلم كان بيراودنى
حطيت راسى على رجله
بكيت
طبطب على ضهرى
غفيت
ميّل على ودنى
وشوشنى بكلام كتير
مسمعتوش
كنت مركز فى ابتسامته
كنت ساكن جوّا حضنه
يا خساره بس
الوقت راح
قام وسابنى
دخل جوّا
جوّا صورته
أصله
بيحب يموت بدرى
