مسابقة مجلة همسه
قصيده عامية بعنوان متبعديش
صابر أحمد عبيد
إخترتي ليه الفراق
وزرعت شوك الألم
طبع العناد حراق
ونهايته قسوه وندم
إخترتي واختارنا
ياكتر أعذارنا
جايز أكون غلطان
بطبيعتي بتسلي
لكن بحب البيت
والعشره والأولاد
جايز غباء مني
جايز عشان سنّي
جايز يكون إني
متلخبط الصوره
وباشوف صحيحها غلط
أيوه انتي ضحيتي
وتعبتي من ظنّك
ف الحب حبيتي
والصدق كان منّك
ليه تكسري الرغبه
ف وجودي جواكي
إيه اللي طب غيرك
بالقسوه وملاكي
متغرقيش العمر
علي بحر عصيانك
مضّي العيون السمر
علي صك غفرانك
متضيعيش نفسك
وتقطعي الموصول
فكي حزام القلق
مشوارنا مش هايطول
أنا وانتي زرعة شجن
ليه يحزن المحصول
الجن والأرباب
بيعيشو بالثانيه
متسكريش الباب
وتموتي الدنيا
أنا اللي كنت الصقر
ف شهامتي وجرئتي
بستحلفك بالحب
وبضحكه العنبه
سيبي الحساب والجبر
متحكميش فينا
غير السماح والصبر
والعشره والطيبه
مش برضه م الحكمه
نكوي بإدينا الجرح
ونخيط الماضي
بالرغبه ف الحاضر
والحكم للقاضي
وحده اللي هيحاضر
بتشدي وتليني
وقت اما اقول حاضر
وتغيبي وتجيني
وقت اما اكون حاضر
بتشقشقي ب زعلك
وتعتم الضحكه
وتكشري ف دلعك
وبتكسفي الرقه
موصوفلي اعيش فيكي
معمول عمل إني
تخطفني مشاويرك
وانسي خطوط سيرك
واهرب وانا أسيرك
وارجع ولا كأني
