ماهو مش مجرد حزن ويعدى
يبقي له في القلب الحنون
دكان يبيع الصبر
وفيونكات لديل حصان الشعر
وعرايس قماش
وعيال تشب عشان تطول إيدها
بنوره إزاز
مليانة كرمله
ولبان
فتوقع الرصه علي الأرض
عندى هوايه غريبه بحتفظ ف جيوبي
بتذاكر قديمه لمترو
ولسيما
وطوابع بريد
صوت عبدالحليم حافظ ف أهواك
قصيده الجنوبي لأمل دنقل
موت صلاح عبدالصبور من كلمه
كوبايه لسه ف ريحتها بيره
كل اللي خذلونى
قصافه
مشط كبريت
مع إنى مش بشرب سجاير
ريحه بنات عدوا مع الايام
وتركوا لي شجن بيزيق ف رئتينى
كل مابتيجى مواسم البرتقان
طب إيه علاقه الحزن اللي بيعدى
بكل أركان الجريمه ف حق روحى
وليه بشيل ف جيب قميصي حاجات
تتقل الصدرمن ناحيه ببان القلب
وإيه مزاجى ف حزن طازه كل يوم
وإزاى مابتعودش علي حزن بايت
وإيه يخلينى أفتش صفحة النعى ف الجرانين
وإزاى أشوف نفسي وأنا المليان حياه
وورد.
وخيول
وصخب مزيكا
وأغانى
وبنات
وطيش
ودرجه من درجات إيمانى بربنا
إنى شاعر
إزاى ماأنقذنيش م الورطه شعرى
إنى حموت زى أى فراشه متحنطه ف لمبة نيون
زى أى بوسه نشفت علي شفتين
زى رغبه بتنطفي مع ضوء شحيح
زى حب بيختفي ف علبه صفيح
زى واحد……مش صحيح
وإزاى بيقدر الموت يعشش علي شجر الحياه عندى
إزاى بيدخل جنب عصافيرى
يبات
وليه مفيش فاضل في ذاكرتى
غير جنازات
وأموات
وإزاى وأنا الفرحه ذات نفسها
قدرت الأحزان
تتسحب ف ليله العيد
وبهجه اللحظه
وبينى وبين بنت حضنتها
إزاى بينزل من تحت دراعاتنا
الفراق
الحزن ده إيه!؟
أهله ماربهوش علي الرحمانيه
في سرقه الناس
ماهو مش مجرد حزن ويعدى
حيلزق ف الجزم
ف اللحم
ف براح العيون
حزنك مجرد بنطلون قطعه مسمار
ياتخيط البنطلون
ياتقف عريان
حزن واضح
مايجرش وراه
سعاده
حتى لو عدت
مافضلش منها غير
دفا السلام
ماهو مش مجرد حزن ويعدى
حيكتفك عصفور ضعيف
لبشاعة الأيام
ياتعدى حزنك وتكبش الفرح بعينيك وراه
ياتغرقك…دوامه الٱلام
ماهو مش مجرد حزن ويعدى
يبقي له ف القلب الحنون
عشوش يمام!!!!
