ط
مسابقة الشعر العامى

ما تندمشي..مسابقة الشعر العامى بقلم / مرفت جابر من مصر

ما تندمشي
كلمات مرفت جابر
………….
ما تندمشي …
ياقلبي ع الغرام لمّا
يبيعك بالرخيص ف السوق
دا بكره من الوجع ح يدوق
ويشرب م العذاب ألوان
زرعت غرامك المخلص
بدون ما تشوف ف قلب جبان
وكان حظّك من الطيبه
تكون مرمي ورا القضبان
وترضى العيشه وتصونها
وتشرب ف العطش أحزان
وييجي ف أخر اللعبه
يحطّك خانة النسيان
ما تندمشي على السجان
وزق العتمّه م السكّه

عشان الضي يرجعلك
وحاول تستلف ضحكه
عشان تكسر وجع دمعك
وحاول حتى بالماكياج
تداري الحزن من شكلك
ولو كان الغرام ذنبك
بإيدك تمحي أي ذنوب
تغيّر قِبلة المحبوب
على قِبله بعكس الأرض
تشوفه بيتجه لمكان
بدون تفكير تروح للضد
تروح أبعد طريق عنُّه
عشان تمنع ولو صدفه
يكون طريقين ف سكّة بعض
مدام حلمك ف ثانيه اتهد
بلاش م اللحظه دي تحلم

وسد الباب على نفسك
قصاد ريح الغرام تسلم
بلاش لحظه تعيش ف الهم
وتزرع شوق ف أرض البور
بلاش تتدارى ف العتمه
مدام جوّاك جناين نور
بلاش تقبل تعيش مكسور
وتمشي تزك ف السكه
ياريتك تستلف ضحكه
ولو حتى ح تضحكها
على روحك ..

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى