متاهة . مسابقة الشعر العامى بقلم / أحمد عثمان من مصر

مسابقة شعر العامية:
ـــــــــــــــــــــــــــــ
متاهه..!!
*****
أول ماتفتح الشارع ..
لأ .. أقصد (الفيس)
الحقيقه .. مافيش فرق خالص..
مابين لاتنين
هيقابلك من كل لون ..
غالي ورخيص ..
ناس لُطاف وظراف ..
أدب وذوق، ولسان عفيف
وناس صيص ..
وعيال سيس ..
وناس.. مُصره ع الجهاله ..
ومكبره الدماغ
وناس .. حرفتها السفاله..
والرزاله على خلق الله
وناس شغلتها تسوِّد الشاشه ..
وتقتل البشاشه ..
في وشوش الغلابه
وجوه الجحور.. فيران كتير
بترصد اللحظه اللى فيها تغِير..
تحشّ ف الزرعه قبل ماتكْبر..
وترمي الخير
وديابه تعوي بصوت مخيف..
تشوش على غُنا العصافير
وأفاعي لابده..
مات فيها الضمير ..
تبُخّ في عقول الخلايق ..
أكاذيب ..
أباطيل ..
ملفوفه بشريط حرير
تسقيهم سُم ناقع في كاس عصير
ومابين دول ودول.. ناس على كل لون
زي ماأنت عاوز..
بهاليل مع المهابيل ..!
دراويش حولين المقام
قايمين مع اللي قام..
نايمين مع اللي نام
مش مهم هوه مين ..
المهم .. بكام..!!
وناس ..
وناس ..
وناس ..
قرفت خلاص..
م اللى رايح.. واللى راجع
م اللى نازل.. واللى طالع
من ضباب الشوارع..
وضلال (الفيس)
الحقيقه..
مافيش فرق خالص
مابين لاتنين ..!!
ـــــــــــــــــــــــــــــــــــــــــــــــــــــــ
الاسم : أحمد حسن عثمان
البلد: مصر
موبايل: 01284151565
أرضي :055/3766065