للمسابقة العامية …
الدورة الثانية
كتب إيهاب صالح الشعراوي قصيدة بعنوان ” متغندرة ” 8/2/2014م
كلام الناس
محيرني
مغيرني
مشتتني
حارق دمي
مخليني نسيت نفسي
كلام الناس
معذبني
دابح حسي
بجرحني
بيتعسني
سادد نفسي
يقولوا : شجرة مرفرفة بنسيم عليل
يقولوا : بحر موجه عال أوسلسبيل
وساعات يقولوا :إنها بنت راجل
كان مهاجر
وأمها كانت بنت ليل
من العواهر لابسة الجواهر
تغري بيها السكرانين
كانت
كانت متغندرة
ومفكرة
إن بدلعها تغرى الشباب المحرومين
ما تقولشي عاهرة من العواهر
تعرف من العواهر ليه
عشان سمحت لك واللى زيك
تمسك مناصب وتبقى بيه
سلوا
كل آلهة الجمال التى
كانت
ومازالت
في رحابك تحتمي
وحياة ….
كل آلهة الجمال
كل أم عندها عيال
كل أب شقيان
عشان يوفر لعياله لقمة حلال
وحياة كل القهاوي المليانة بشر
قلوبها شايلة الهموم أحمال
وحياة حبيب ألف في الهوى موال
يا أرض
بيبوروك
وبيبنوا فيك
بيعدموك
ويقسموك
عشان ما فيش فيك قانون
كله خلاص
كله بح
كله فنيتو
ما قانونا ولع في الكانون
تحلف ما تحلف
أنا مش هصدق
خدينى
خديني يا اما أوعي تسيبيني اغرق في نيل السبع بقرات
خدي ايدي يا اما أوعي ترميني في أرض بلعت السنبلات
خدي ايدي يا أما
ووديني بلد
ما يكونش فيها الحب مات
من سكات
من سكات يا أما احضنيني وطبطبي
مش عاوزك في يوم مني تغضبي
من سكات
من سكات
غسلينى
كفنيني
ادفنيني
من سكات بس اوعي يا أما
أوعي تنسي تطبطبي
