خاص بالمسابقه
قصيدة شعر عامية
الشاعر /عبدالله علي نظير هويدي
من مصر
إسم القصيدة
(مجذوب على أمري )
مـــــــــجذوب على أمري
****
عيونك هي آخر شط
سفينة قلبي وصلتها
ولكن لنتظار ممنوع
رصيف المينا متقفل
وانا اللي عليا أتكفل
بــبر أمااااان ينجينا
وموج البحر كان هادي
قَلب فيضان من النشوة
وبات إعصار من الحيرة
حراير صدري عريتهم
وعرّيتهم….
لأني كشفت عوراتي
وسبت الماضي والآتي..
عشان أوصل لأوصالك
وأنصالك ما بتسميش
بتقصف عمر مجاذيبك
وانا مجذوب على أمري
فردت شراعي لهوايا
وكان جوايا بيتابع
قفلت الباب على العالم
وحطيتني ف وش الريح
توابع هزتك ليا ..
ماخلتنيش آخد ساتر
ولا اتحصنت م الأهوال
وكان الأمر بالرحلة
محال ما يكونش له تصديق
برغم الضيق ورغم الخوف
ورغم العتمة ساعة الشوف
ظروف إيه اللي تمنعني؟
وكام إيه يعني.. نجدتني
وغمتني وحلتلي وانا اتحليت
بميت حيلة تحللها
فتحلالي وأحلالها
وابات محلول..
من الحسابات وم الحسبان
م انا ف الأولة إنسان ..
وأولالي أكون نساي
مااحبش حد يسألني وصلت ازاي؟
طريق البر كان عنوان
وايه ودّاني للمية
بخاف من لعبة الأمواج ..
وم الجنية والأساطير
وطول عمري بغار وأغير
وسيرة الغربة تفزعني
غامرت بمركبي الدايبة ..
وسايبة ف إيدي تصريفها
وكانت طلتك شياطين
ومين بس اللي يصرفها؟
جبال أمواج تغطيني
وعيني عليكي لم تغفل
ولم تيأس ولم تحتار
وادينا ف آخر المشوار
بقولك رسي مركبنا
تعبنا من السفر، حني
أنا اللي عينيكي أوحتله
وجاني الوحي برسالة
توحد أمُـة الأشواق
وبشرى بعرشك العذري
قوليلي الوحي كان صادق
ماكانش مسيحك الدجال
ولا بن سلول
وسلسلني بنفاق شوقك
وأنا صدقت
قوليلي المرسى علشاني
ومديلي الرموش (جودي)
وجودي بروحي ووجودي
أنا استنفذت زوادي …
عشان اوصل لهذا الخط
طريق العودة لو جبري
فأحسنلي أموت ع الشط.
