خاص بالمسابقه
الشعر العامي
عادل محمد زوين
البحيره-رشيد
رقم الموبايل: ٠١٠٩٧٤٣٩٧٦٩
—–
قصيده بعنوان: مدينتي
—
صباح بيهل يا مدينه وانا المشتاق لأحضانك
انا الدايب في لون شمسك وانا بابك وعنوانك
انا الهايم علي دربك وانا الترتيله في لسانك
وساندك حتي لو مِلتِ انا سقفك واركانك
انا العطفه وانا الشارع وانا الحاره
و بقسي ساعات عشان النفس اماره
وبرجع احن لعبيرك ومهما النور بيدّٓاري
بكون نورك وطلِّه شمس لنهارك
صباح الفل يا عايقه
وفي توب الشموخ لايقه
بحبك والسما رايقه
ولما تْغِيم يحن الخير فأمطارك
صباحك نادي يا بلادي
يا دمعه تتوه فأبعادي
يا طير مهموم لكن شادي
و ده العادي يقينك خلفه اصرارك
لكن ليا عليك عتاب
لإمتي هنتظر عالباب
وامتي راح يعود لاغراب
لحضن احباب في ضِله توته فجوارك
لإمتي الفُرقه تغْلبنا
ده كاس الفُرقه غلِّبنا
ونارنا ليه تعذبنا
ياريت نرجع كما كنا ونبقي عالعدا نارك
وييجي الصبح بإيدينا
نضمك وانتِ ضمينا
ونعبر بيك يا سفينه
لبر الحب والمينا انا ومينا وأحرارك
وحشينا و زاد شوقي
لطعم اللمه وشروقي
وعارفك شامخه هتفوقي
بإخلاصنا و وحدتنا هتعلي ويعلي مقدارك
