مساء الخير على عيونك.مسابقة الشعر العامى بقلم / علاء محمد أبوذكري

خاص بمسابقة الشعر العامي
الاسم علاء محمد ابوذكري
جمهورية مصر العربية يعمل بالخارج
موبايل 0508361463
=======================
مســــــاء الخير على عيونك
———————————–
مساء الخير على عيونك
وكيفك يا طويلة البال
زرعنا الحزن ف جفونك
وضاعت رنة الخلخال
انا والخال بندعيلك
بطول العمر يا غالية
يدوم لينا جمال نيلك
تعيشي ام للدنيا
ده كم من صبح بيعدي
وحاله يبقى غير الحال
مساء الخير على عيونك
وكيفك يا طويلة البال
—————–
مساء الخير على قلبك
وع الناس اللي بتحبك
وع الماشي وع الراسي
وع الناسي جمال قدك
ومن قدك يا أرض الخير
ياغنوه من غناوي الطير
ده كان فرعون وعدى الكون
ولا أستحمل غناويكي
وكم من عله بتعدي
وبتَهَدي تورِيكي
دهان الوش بالبويا
تشيلة غنوه بالموال
مساء الخير على عيونك
وكيفك يا طويلة البال
————————–
مساء الخير على ناسك
وع المكتوب فى كراسك
ومين زارع ومن قالع
ومين ماسك زمام فاسك
ومين حافظ غناويكي
ومين باعك ومن داسك
مساء الخير على مينا
وع الوحدة ف أسامينا
تعبنا ومين يراضينا
سوى وحدة أراضينا
ويطلع م الليالي رجال
تبدد ليلك القَتَال
مساء الخير على عيونك
وكيفك يا طويلة البال
—————————
مساء الخير على بلادي
يا شايلة الخير لأحفادي
مـــــسير الليل يعَديِنـــــا
وترجع تاني أعيادي
نغني للهوى موال
يا ا م الطرحه ويًا الشال
ومهما تطول لياليكِ
أصيلة مهما حظك مال
مساء الخير على عيونك
وكيفك يا طويلة البال
===============
علاء أبوذكري