علاء الدين علي
قصيدة((مستحيل المجتمل))
**********************
مستحيل المحتمل
لفت خيوط الشمس حوالين القمر
خارت عزايم ضلمته
غار القمر لما لقي
الأرض لابسة توب حزين
كيانها ليه صايبه السواد
مع إنه فارق دنيته
بعت إنعكاس الضوء
مجزأ ع الليالي كلها
لجلن يعاند أرض كونه المظلمة
الأرض قالت ياقمر
الشمس خلتني أبور
لما الأشعة بخرت ف الطين بلل
كشفت جدوري الهفتانين
وكمان دي وصلت للأصول
مهما السحب بعتت مطر
الشََق رافض يلتحم ويا أخوه
بطني اللي شالت همها
مستورة دافنة حزنها
صبحت حريق طول النهار
معرفش إيه اللي جرى
مات المزارع اللي فاهم زرعتي؟
ولا اللسان لما إنقطع
خرس الإيدين
هوّ إنت ناسي يا قمر
الشمس نارها وسطنا
بنلف حواليها بمعاد
كل المجرة مبرمجة
بالسوفت وير الإتحاد
صبحت نجومه مفككة
قدرت تفجر كل نجمة منورة
وعشان م تحتل السما
سايبة الكواكب لما تاكل بعضها
تعالى مرة نتفق
هات العطارد برضو هات المشترى
ونروح زحل نحيي المثل
الشمس واحدة وإحنا أقوى منّها
لو كنا واحد كلنا
نعكس مسارات إنفجارات السحب
نصنع مطر ……….. يطلع لفوق
يطفي اللهيب اللي حرق
وطن الكواكب كلها
قال القمر نازف دموع
حلمك يا أرضي مستحيل
ردت كفاياك إنكسار
دا المستحيل بالإتحاد
يصبح أكيد المحتمل
