مستنيك_ قصيدة للشاعر/ طه إبراهيم

مستنيك_
***** شعر عامية
اوعي تفكر يوم تلغِيني
انا موجود والمولي حميني
كُرهك بُغضك حِقدك
طاقه في جسمي بتقويني
إكره فيّا أدّ ما تقدر
كُرهك ليّا بيّصحيني
انا م الآخر عارف هدفي
وانت بنفسك …… …..
كنت أمبارح بتحيني
ليه دلوقتي جاي تعاديني
إنت عاملها حرب وجود
نفسك يوم تلائيني بموت
وانك ترمح فيها لوحدك
وانك تقدر تنهي مشاكلك
لما تلائي الدنيا سكوت
فاكر يعني الدنيا هتمشي
وانك زي الوحش هتجري
وانك وسط الزحمه تفوت
تطلع تنزل تخرب فيها
تبني وتِهدم أي بُيوت
لا يا صديقي…………….
…………..لا يا خفيف
انا مش خاين………..
…………….وانت شريف
انا مش ظالم…………..
…………..وانت عفيف
انا مش جاحد………….
وانت النسمه وزي الطيف
انا مش جاي………….
من كوكب تاني…….
انا موجود…………..
والناس عرفاني……….
وعمري ما كنت ……..
يا صحبي .. ضعيف
ولاّ عشان انا وسط الناس
وانت معشش ف التكييف
و لاّ عشان انت ابن زوات
أكل ومرعى ومشويات
ليل ونهار تُطلب في حجات
كل حياتك…………..
………….. عايز هات
وانا طول عمري………
وكل طموحي ألائي رغيف
و لاّ عشان لما انت بتحلم
يبقي الحلم يا صحبي حقيقة
حاجه فى إيدك بعد دقيقه
و انا لما احلم………..
………… يعني بهيّس
واللي يقولي اتغطه كويس
واللي يقول بطل تخاريف
واللي يقول فلاح غلبان
لسه بيحلم زي زمان
وادي طيابة أهل الريف
واللي يقول واللي يقول
واللي يشدد ف التعنيف
و لاّ عشان الدنيا في إيدك
حابس خيرها يا صحبي
في جيبك……………….
وانا مش قادر ع المصاريف
واما تجيلي فاطورة ميه
امسك قلبي واقول يا لطيف
وآه لو جالي اللي ف بالك
وانت ممدد وسط عيالك
أجري ودوّر ع الصّريف
ده خلاك تتحكم فيا
مره تسبب ليّا أذيه
ومره قضايا وبالتزييف
وانك لائي حد يصدق
يعني الامر بجد مخيف
بس اقولك انا مش خايف
مهما تكون قدامى عنيف
تقدر تلعب فيها برحتك
انا دلوقتي يا عمي صارحتك
لكن لازم تعرف حاجه
إني بقيت زيك حرييف
لا يا صديقي……………
…………… لا يا خفيف
عايزك مره يا صحبي تفكر
إن الدنيا ليا وليك
ليه بتبعني في عزّ الشدة
وانا م الاول كنت شريك
ولاّ بقيت الابن الشرعي
وانا براوي … أو بحراوي
وأمي و أبويا من المماليك
و لاّ بقيت الابن الحيله
واكبر واحد جوه العيله
وأنا منبوذ وسط الصعاليق
أما صحيح الامر غريب
مَنتاش لايئ ف التخريب
اصحي وفوق الله يخليك
بلدي هتسعد بيا وبيك
لو فكرت تزورني يا صحبي
بِروحي وقلبي انا مستنيك
*****
بقلم \ طه إبراهيم