مشاعرى جيوش ..مسابقة شعر العامية بقلم / رفعت حسن السنوسى

باسافر جوه أحلامِك
وَابَحَر في خلاياكِ
ولو تاخديني خدامِك
بعيشي وملحي مَحْلَاكِ
فى يوم فرحِك تناديني
أعيش بِالْعِز في هواكِ
فى يوم جَرْحِك تلاقينى
يسيل دمي وِ دا فداكِ

وأزرعلك شراييني
شجر ضلة على بابِك
أكون درويش لنور عيني
أعيش بالحب في رحابِك
وانا شابك على سنيني
مشاعري جوه أعتابِك
ولو راح اموت يكفيني
يكون كفني في جلبابِك

دَانا النسمه اللى بترفرف
وبتهفهف على أرضِك
أنا أملِك ونور بكره
أنا قصدِك وانا غرَضِك
وانا الجندي اللى هاويكِ
ومِسْتَشْهِد فِدا عرضِك

وِ بَافرش تحت رِجليكِ
ومن قلبي حروفي نِجِيل
و بافرد ويا خطاويكِ
ومن حبي قصايدي نخيل
يضلل فوق أراضيكِ
ويطرحلك غُنَا ومواويل

وابُص لجوه في عينيكِ
ومن قلبي وأقول مالِك ؟
واقولك فضفضي ليا
دانا ضهرِك وانا مالِك
فداكِ الدنيا يا غالية
دانا ادفن فيكِ عُزالِك

سلامة قلبك الطاهر
سلامتك من وجع ضهرِك
ولو تهجم ذئاب الكون
انا روحي تكون مهرِك
ولا اسمع يوم في آهاتِك
ماشوف ذلك ولا قهرِك

وِبَمْسَح من غناويكِ
ومن قلبك آهات الهم
ولو مرت غيوم سُودَه
وِ لو عَكَر في نيلِك غم
على عيونك أنا رموشك
أنا أحميكِ وَلو بالدم
مشاعري جيوش تلاقيها
في حبِك كلها تتلمّ

طيوري تغني فوق أٍرضِك
وأعيد البسمة ف ملامحِك
يِزَهْزَه في الغيطان قُطنِك
وِعِيشي يبقى من قمحِك
زمَنَّا لو غدر بيكِ
راح ارسم بِالغُنَا فرحِك
أرُش مشاعرى في عينيكِ
واعالج بِالنَدَى جَرحِك