معلش سامحيني .مسابقة الشعر العامى بقلم / عمر عبد الفتاح ابراهيم عبد المولي مراد

الاسم :عمر عبد الفتاح ابراهيم عبد المولي مراد
اسم الشهرة : عمر مراد
محافظة القيوبية
نوع القصيدة :عامية مصرية
عنوان القصيدة : معلش سامحيني
رقم هاتف :01015897906/01282840098
ايميل /[email protected]
————————-
معلش سامحيني ،
انا ،مش ، بنفس المواصفات ،
ومعيش ، سواي ،
مملكش ، من بعد اما مات والدي ،
سوا ، ضهري ، الحجر ،
مملكش ، غير هذي الوظيفة المتعبة ،
و ساعات ، بقضيها فقراية ، كام كتاب ، وقت السهر ،
وبنام ، وانا بكتب قصيدة ،
واقوم ، وانا ، راضي ، بما ، حكم ، القدر ،
ويادوب ، مأجر شقة ، على قد اني اشوف ، وسع السما ،
انا حالي ، يسمح بالجواز ، لكن بواحدة من البشر ،
معلش سامحيني ، قولي لاهلك ،
ان شكلي كان ، جميل ،
وان الهدوم ، الي لابسها ،
كانت بتوحي ،اني ، الامير المنتظر ، ..!!
معلش ، سامحيني ،
ان كنت حبيتك ، زيادة عن الحدود ،
معلش غصب عن ارادتنا الهوى ،
بيصيد قلوبنا ، من بعيد ،
والطعم كان في عنيكي ، مش قد الصمود ،
ايه الي يجعل ، شخص زيي ، يعشقك ، غير الخلود ،
معلش سامحيني ، وعادي زي ما اخترتك ، عشان حبيت اعيش ،
اختاري اني اعيش في بعدك او اموت ،
قوليلهم ، اني كنت وقت ، وفترة عدت والسلام ،
قوليلهم اني كنت بشبه ، للي نفسك ، تعشقيه ،
الي نفسك ، تقبليه ، زوجا ، امام الناس ، تشاوريلهم عليه ،
وتقولي اسمي باهتمام ،
وخلاص سلام ،
مش راح اقولك ،
وحشتيني ، كسرتيني ، هدمتيني ،
حضني بيشتهي حضنك ،
وعينك ، واخدة من عيني ،
وحتى اذا اتقابلنا فيوم ،
هغض الطرف ، عن شوفتك ،
كاني ،عمري ما عرفتك ،
ولا عمرك عرفتيني ، ..!!
فسامحيني ،
انا عادي مسامحك ، راضي ، كل نصيب ،
هكمل , وانتي ، مش ليا ،
وهحضن ، غربتي وهغيب ،
وهرسم ، في السهر ، روحك ،
و هكتب نص ، لجروحك ،
بما إني ، أنا الغلطان ،
فعادي عقابي ، يبقا ، شديد ،
اقول ، اسف ، واقول معلش ،
واقول ، بكفاية حبتني ،
طبيعي ، فيوم ، كات فركش ،
عشان وقت ، الهزار بيمر ،
بدون تفاصيل كتير ، وحاجات ،
فوقت الجد ، لما يحين ،
بتتغير ، كتير حكايات ،
ولازم ، نركن ، الاشعار ، والاشواق ، ونتفاهم ،
بتملك ايه ، يابيه وكلام ،
وساكن فين ، و قبضك كام ،
و شغلك هل يناسبنا ،
لا ، طيب ، خلاص ، سيبنا ،
وده ، المفروض ،
منين جتنا ،
ده قبض ضعيف ، وسكنك ، يعني مش ولا بد ،
وشغلك ، برضو ، وضعو ، خفيف ،
شهادتك برضو مش هتسد ،
انا عارف بان ، الحب ، بات ، تفاصيل ، مابتهمش ، في وقت الجد ،
انا عارف بان كتير بيتفارقوا عشان ، كان حد ، مش لايق اوي على حد ،
انا اسف عشان فكرت اني فيوم ،هكون ليكي ،
كسفتك ، وانتي كان باين ، على عيونك ، اوي الاحراج ،
مكانش فنيتي ابدا ، خانتني القصة ، والاخراج ،
وكان الواقع ، المؤلم ، ماهوش باين ، عشان حبيت ،
ماكنتش فاكر ان الحب ، هيخليني ، ابان كعبيط ،
فسامحي ، واطلبي ، منهم يسامحوني ،
ومش زعلان ، ولا حاجة ،
ولا بالرفض جرحوني ،
انا الغلطان من الاول ،
عشان أمنت بعيوني ،
انا الي استاهل ، إني ، أزعل ،
لكن انتي متستاهليش ،
مصيري عادي هنساكي ، وتنسيني ، كأني ما كنت ،
مصيرك ، ويا مين شبهك ،
إذا سألك ، عشقتي فيوم واحد قبلي ،
تقولي ، مفيش ،
مصيري هحب يوم غيرك بنفس ، الشكل ،
علاقة بتنبي يعني ،بناء ، عالظروف والاهل ،
واجاوبها اذا سألت ،
هل حبيت سواها فيوم ،
هقول، طبعا ، عشقت سواكي ، يوم واحدة ،
لكن هيا محبتنيش ، …!!