ايام تمر .. ودهر يغر
ويضيع من العمر الصبا
نغلط وياما غلطنا يضر
ونقول غلطنا تجربه
ومن تجاربى عرفت كتير
إن الاسود حتى ف موتها
لها مهابه ولها تأثير
مش للكلاب رغم حياتها
وعرفت ناس مالهاش عماد
يسند لها سقف الدنيا
وناس كتير ناسيه الوداد
تعاشرها لكن بالثانيه
وعرفت ان كلام مكشوف
احسن كتير منه مبرقع
قول اللى جواك ع المكشوف
واستر عيوبك بالبرقع
وعرفت دنيا عايشينها
متشعلقين أوى ف سنينها
على أد مابنغلب منها
برضه الأمل بيهونها
الدنيا فرقه أو ضمه
الحلو فيها .. وفيها المر
ملخصينها ف كام كلمه
أيام تمر ودهر يغر
