
الشاعر عمر شمروخ
رساله من قنا /محمد عبدالله صالح
طعم البيوت
المشهد الثالث ” اهلا رمضان “
هي ………….
رمضان يدق الباب مع حس مكاوى …
القلب لسة ما تاب فيه جرح م الكاوى …
عايزين شكارة فول لاجل السحور معلهش
وياريت تجيب الدش من عند عكاوى …
تنساش تجيب الرز واللحمة مفرومة …
انا شفت عندك عز والله ما ف روما …
طول السنة ع الفول ارحم عشان رمضان
كلب الجيران كل ضان وانا جنبه محرومة …
هو ……..
رمضان ده شهر الصوم مش شهر بعزقني …
كني ياناس غيط بور ودي عايزة تعزقني …
بافطر بلح وعصير وسحورى لازم فول
ارمي الطبيخ معقول وادعيله يرزقني …
هي ……….
الناس علي ده الحال تعملش طب ناسك …
وتقولي قولنا وقال او عيشي عيش ناسك …
تنساش تجيبلي ياميش وكمان معاه جوز هند
بكفاية شغل العند طبعك شديد ماسك …
هو ……..
اخرتها قلتي بخيل والقبض وياكي …
عارفك تبيعي النيل لو ربنا اداكي …
عندك سطوح البيت لو تشغليه بصحيح
كان نلقي ديك بيصيح او فرخة بتكاكي …
هي ……….
بعت اللحاف وخلاص اللي انت جبته جديد …
اهو نبقوا زي الناس ونجيبوا كحك العيد …
وان زاد علينا الشتا حضنك يدفيني
انا بس يكفيني حبة حنان يا بعيد …
هو ……….
بعتي اللحاف ع الكحك طب اعمل ايه فيكي …
من امتي وكل البطن …. هيغطي رجليكي …
شد الشتا وقالتلي بردانة
انا قلت شدي الكحك … يمكن يدفيكي .