…(( ملوك النار ))
*******************
أنا والريح
وقلب جريح
أنا والليل
وحُب عليل
أنا والشوق
وصرخة عشق
للمخلوق
أنا والآهه والموال
عاشق ترحال
وياما بلاد
ندوَّر فيها
ونسكُن جوَّه
لياليها
وفجأه الوهم
يسرقنا
نتوه فيها
وتبكى علينا
غناويها
وقلب الليل
يلف يطوف
ف ساعة
خوف
تهون البلوه
ع المخطوف
وما يهونشى
ضمور الشوف
ودمع حزين
بيحرق نور
سواد العين
وكله بيبكى
ف المواال
على ليلاه
عيون الآه
ما بتفرَّق
ما بين الطفل
يا ولداه
وبين والديه
وألف جدار
ما بين النار
وبين السجن
والسجان
جبين العار
بيتستر
ف ثوب ثوار
وعايزين ايه
دا بيقولوا
نكون أحرار
ومن امتى
يا ناس الحُر
بيخرَّب
ف قلب الدار
ومن امتى
يا ناس الأخ
بيموَّت كدا
ف الجار
وألف نهار
يدوَّرجوه
ليل القهر
ع الخيبه
ويفرد ذُل
غِلَُه الأعمى
ع الحيطان
تضيع الدار
وتحيا الثوره
والثوار
ملوك النار
وعشق الدم
بيزوّد ف حلقُه
الريق
يشب حريق
ويحرق
أخضرك يابس
وضعتى يا دار
عشان ابنك
صَبح عابث
وقال ثوار
تغور الثوره
لو تحرق
معاها الدار
تغور الثوره
لو تحرق
معاها الدار
***************
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
