ط
الشعر والأدب

مين على المئذنة .قصيدة للشاعر / محمد أبو العبادى

….
……

الشمس مش حر انما

جوايا نار

حاسس بطعم الانكسار

م انا ليا م السنوات كتير

صايم ومستنى الفطار

الفجر كان مع صوت بلال

ع الكعبة واقف يبتدى

تكبيرة اليوم الجديد

وانا كنت واقف من بعيد

ناوى الصيام

كان الامام خير الانام

الضهر مين ع المئذنة

الصوت غريب

حتى الاذان طالع نحيب

مين العدو

من الحبيب

مين السبب ف الانهزام

العصر كان تعظيم سلام

للفارس اللى ف ايده سيف

وف حضنه بنية حمام

نازل صلاح من ع الحصان

رافع دراعه للسما

بيلم كل المهزومين

حطين دراع المكسورين

قال الوطن مفتوح براح

للمولى وحده كل دين

واهو راح صلاح

ورجعنا تانى مكسورين

متكتفين

واقفين على طرف الحياة

والدم بين القبلتين

وانا برضو مكتوف الادين

شايف جبال الريح عفار

والشمس مش حر انما

جوايا نار

م انا ليا م السنوات كتير

صايم ومستنى الفطار

واما النهار سلم خلاص

لبشاير الليل عهدته

وكأنه حس بغلطته

صوت الادان كان مختلف

شقيت صيامى بتمرتين

حسيت ف حلقى بالمرار

ازاى حينزل جوفى زاد

والاقصى نايم ف الحصار

ازاى حينزل جوفى زاد

والشام مسلسل ف الحديد

الفتنة دايسة كل شئ

مع اننا

دلوقتى مش ف زمان يزيد

ازاى حينزل جوفى زاد

والموت سكن ارض الرشيد

دم الفرات صار مستباح

وكأننا ف عصر التتار

وهولاكو عاود من جديد

ازاى حينزل جوفى زاد

واخواتى عايشين ف الخلا

ووللدى نايمين ف الدمار

الشمس مش حر انما

جوايا نار

حاسس بطعم الانكسار

م انا ليا م السنوات كتير

صايم ومستنى الفطار

طبطب عليا شيخ عجوز

قالى ابتسم

بعد الضلام راجع نهار

بصيت فى عينه وابتسمت

وحاولت امد الايد عشان

تسندنى لقمة ف الصيام

لكنى ما لحقتش عشان

زغزغ ودانى صوت بلال

ع الكعبة

بيقول الادان

محمد ابو العبادى

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى