نال الشهادة .مسابقة الشعر العامى بقلم / محمود ربيع عبد الحميد

…………………………..

قلبي اللي ضاع واشتقت له

كان نفسي اشوفه وابص له

تحويشة العمر اللي فات

بيقولوا مات

من غير ما إيدي تسبله

ابني اللي كان زين الشباب

حامي البلاد

وحارسها من نبح الكلاب

كلمته آخر يوم وقال

أنا جاي يا أبوي

جايلك وفي إيديا الشهاده

مختومة بالنسر اللي طاير م السعاده

عارف يا ابوي

إبنك متين واقف وتد

حامي الحدود زي الأسد

واصحابي في الدفعة كمان واقفين

رجاله وف ضهر البلد ثابتين

حالفين ما هنطاطي لغير الله

متوكلين

والمؤمن الحق يتوكل علي مولاه

سلم لي يا آبا علي البلد والاهل

عمر الفراق عنهم ما كان بالسهل

سلم لي علي أمي وبوس أيدها

خليها تدعيلي ف صلاة الفجر

خليها تدعي ل (طه ) صاحبي يا ابوي

ما اهو مات شهيد

قتلوه بخسة وغدر

كان لسه راجع م الاجازه يادوب

كاتب كتابه وجابلنا الساقع

بنده عليه مبروك يا احلي عريس

فلقيته جنبي من الرصاص واقع

ماسك سلاحه ف أيده كيف الصقر

وانا كنت جنبه ، والرصاص مجانيش

ما اهو فيه جدع بيموت

ويخلي غيره يعيش

علي رأي ناس قبلنا

مصنع رجال يا جيش

ف سلامي يا آبا لكل من عندك

ويومين تلاته واسلم المخله

وارجع يا ابوي حامل شهادة

مختومة بالنسر اللي طاير م السعاده

عمرك ماتكدب ياولد

راجع بطل نال الشهادة

والدم سايل ع البياده

الموت فداكي يابلد

افضل عباده.

……………..

محمود ربيع عبد الحميد