نجوم الضهر..للشاعر / علاء الدين على

*********
أحلامي بس
يادوب ورق
وأنا من زقاق
جوة القلق
من حارة عتمة مضلمة
اولها شوك تمشي عليه
وأخرها ألوان الغرق
واللي إتسرق
قلبي الضعيف
واللي إتفلق
أفكار بتشغل عقلنا
إزاي هنرسم حدنا
لجل النجاه
أونشرب البحر الكبير
من همنا
من حلمنا
إن إحنا عايشين الحياة
عتبة بيوت الدمع
ليه متكررة
ببدأها دايما بإبتسام
علشان أداري وكستي
هش بصحيح
مفيش ملام
تعالو نبدأ قصتي
صباح الخير
فطلعة شمسك الحلوة
أقولهالك
وأمسي عليكي فالمغرب
وإنتي مروحة للنوم
على شط السما العالية
ومحسودة يا روح الروح
من النجمات
ودا حالك
تباتي بنارك القاسية
وكله يقول
دي نايمة والسهر حالنا
وموالنا
على عاشق
يعد كتير أوي فينا
ومبيوصلش
مش إن التوهة دي حاله
لكنه أصله متلخبط
عنيه زايغة على آهة
وبيبربش
عشان دمعه مينزلشي
لحد الفجر يستقبل
حبيبته الشمس
وبيهلل من الفرحة
عشان يتكرر المشهد
يضيع عمره كدا بحالتين
فرح ساعة ويومه أنين
وييجي يعاتب النجمات
ليه مبتظهر في عز الضهر
عشان يقدر يشوف غيرها
ويطلع من ورق شعره
كما الإنسان
كلماتي // علاء الدين علي