الأسم /احمد حامد رسلان
مصر- اسيوط -ديروط
…..
نحو الامية
……..
شالوا وزير جابوا وزير
والتعليم محتاج تغيير
قلت اما أسأل عمي سمير
راجل خبرة وفيه الخير
رد وقلي السر خطير
فيك من يكتم سر في بير
…..
التعليم ماخلاص اتبهدل
مبقاش فيه رابط ولا حابك
من يوم لما المخفي استندل
والتعليم اصبح متهالك
يعني لا فيه خطة تستعدل
ولا منهج بينمي مدارك
غير حبة افلام بتمخول
لمبي وموته وتوشكا مسالك
من يومها الاولاد بتهبل
مطوه وسنجه وشغل معارك
وان جيت مره بتنصح عيل
يبقي رميت نفسك في مهالك
…….
تلقي الواد جايلك متأخر
لا ويغيظك انه يهزر
عامل شعره المخفي خنافس
بالسلسلة واقف يتمخطر
سارح طول اليوم بالتوكتوك
جاي مدرسته ينام ويشخر
…….
طول السنه مايشلش كتاب
ومقضيها عناد وغياب
واما بتسأله ليه بتغيب
تلقي جوابه العيشه هباب
وان ابوه مالاقيش قبقاب
وان التعليم بالنسباله
فك الخط يادوب كتاب
……
واما بتيجي الامتحانات
تلاقيه جاي يعمل حوارات
واخد الغش ده حق طبيعي
بيه بيحقق حلم الذات
يعني عشان ينجح ويعدي
يلزم بقي غش ومسدات
……
وان رحتلك مدرسة فافي
تلقي الحال زفت ومتعافي
اصل البيه جايلك بفلوسه
يبقي هينجح فوري وصافي
……
وان جيت تعمل فيها مدرس
اوتتنطط يوم وتغلس
راح يدولك صحن مدمس
ونقولك باي باي وعوافي
…..
واما بياخد حد شهادة
تلقاه محتاس فوق العادة
يفضل دايخ سنه علي وسطة
لجل مايلقي الواد شغلانة
…..
واما يلاقي وظيفه عكاشه
تلقاه لايص ف أبسط حاجه
اصل البيه شغال بالكوسة
يعني معندوش أدني كفاءة
……
وهقولك علي حاجه بغاشه
لجل ماترتاح عمي الباشه
دي خلاصة التعليم في بلدنا
فقر وجهل وشغل سياسه
……
زجل / احمد رسلان
