ندى
…….
طب تحلفي
والا تسيبيني أحلف انا
انا قلبي شبعان م الغرام
وبقول حرام
قلبك ده حته من الحجر
إحساسي بيكي
الجمر ما يتحمله
وده أصله كان من أوله
إحساس وليد
شافك في قلب نهار سعيد
ليله استحى
من نور جبينك قام رسم
قطرة ندى
ع الخد نادت ع العطش
من بين بحور الكون
عشقتك يا ندى
صبحي ابتدا
لما لقيته ف سكتك
ورد الرصيف واقف بيرصد مشيتك
بتزيدي ليه من خطوتك
اتمهلي
ده العمر لسه في أوله
والشوك بأيدينا نحوله
بستان امل
فمتهتفيش
ومترفعيش
كل البيارق للسما
ومتطلبيش
م اللي كسر جوانا فرحة عزنا
انه يكمل حلمنا
حلمي وحلمك كان بسيط
وانت اللي دايما مؤمنة
أن الأمل جوانا لازم يتولد
واللي اتولد كان مسخ مش مخلوق لنا
احنا اللي بحنا بحبنا قبل المعاد
قبل الطريق ما نمهده
ونحدده
مين اللي غير في الشوارع قام بنى ميت ألف سد
ليه كل جسر من الاماني بنعبره يتهد
ليه استكتروا عل القلب حبك يا ندى
د العمر لسة ف اوله
والكون فسيح
كل اللي خانك من زمن
خانوا المسيح
شجر اللهموم ع الارض
ما بيهزه ريح
اياكي يوم تستسلمي
وتسلمي
كل الرايات
واياكي لحن الخوف
يصيب الاغنيات
عاايشة ما بينا الامنيات
لكن ساعات
الحلم
بيصيبه المرض
لكنه مش ممكن يموت
لو مات في حضنك يندفن
منصور أحمد عبد المقصود
خاص بمسابقة العامية
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
