حلم كافر تعبت وسيبت احلامى تضيع مني عافرت وقولت هبقي تمام (مع الايام) رميت ورا ضهرى احزاني عشان ماابكيش جريت لما انقطع نَفسي.. رجعت كتير بخطواتي ورجلي العاجزة مش قادرة ولا مره تخطي الخطوة علي قدام . . لاقيتِك نجمة كنتي بعيد حلمت اطول ولو ضيك وكنت هموت واقولك كلمة ازيك دعيت الله عشان يجمعني بعنيكي سهرت الليل ببص من الحنين ليكي . . وبكتب كل يوم غنوة واغنيها علي امل انها ممكن تليق بيكي قابلتك والحنين زايد وطولتك والهوا غلاب فتحتي الباب قابلتيني وقولتي بأني احلامك وقولتي ان انتي لاقيتيني . . وعيشنا انا وانتي احلامنا سهرنا الليل علي كلامنا وضحكت لينا ايامنا ونولنا من الزمن احلاه وعدتي تكوني ليا امان وعدت اكون انا ليكي بغمض عيني واتخيل وروحي تدوب اوام فيكي رسمت من الخيال كذا بيت فتحت الباب... وم العتبه انا خطيت... لمحتك وانتي قاعدة بعيد وفستانك مع الطرحه خرافه وشيك . . بعدى الباب عشان اوصل واطول ايدك ابوسها بشوق واقول من قلبي حبيتك واخرة حبي طُولت الجنه وعنيكي ببص من الخيال ولاقيته قدامي بيسبق فرحتي قبلي.. وحط الدبله ف ايديكي .. وقفت كتير عشان استوعب اللحظه . . وبعد ماكنت طير طاير من الفرحة وقعت من السما السابعه لسابع ارض م الخضه بقيت تايه مع الذكرى ومع الاوجاع قدرتي ازاي تفارقيني.. تقولي وداع؟ بكلم نفسي وانا بقتلني واتخبى من النااس اللي كانت واقفه والزفه حبيبتي الليلة مش ملكى حبيبتي الليلة مع غيري ياناس واقفة . . أه ع الحلم لما ف لحظة يتحول لغول مسعور.... بينهش ف الخيال ويجور يارتني كنت شوفت كابوس ولا احلم حلم يكسرني ماكنت زمان واقف ع الارض محدش غيري اجبرني ابص لفوق حلمت اطول نجمه من السما لكن... اديني بفوق.. ومن حلمي صحيت مفزوع . . غريق قلبي.. ب يتعلق بقشايه غَرق من قهرى وبُكايا محدش ليه بقي معايا يصبرني وانا المتباع خلاص يعني.. بقي اخر لُقانا وداع هتبقي لغيري وانا وحدي ببص عليكي مش طايلك وانا اللي كنت ف سحابك كما قمرك... بنور عتمة الدنيا عشان هو يكون قدرك؟ ياحظى المايل الخايب مصايب جايه بمصايب بدل مايقولوا انا سايب قِبلت اكون انا المتساب . . ياريتك تفضلي سعيده وتتهنى... قبلتي تكوني في حياته وبعيد عني هسيبلك ذكريات حلوة كتير مني واسيبلي الجاى كله عذاب . . ياحظى المايل الخايب مصايب جايه بمصايب بدل مايقولوا انا سايب قبلت اكون انا المتساب . . ياسمين سليمان ياسمين مكرم محمود علي سليمان
