هو مين فينا اللى مات مسابقة العامية بقلم / خضرجى عبد الله خضرجى من مصر

خضرجى عبد الله خضرجى نجم

المنوفيه
جمهورية مصر العربيه
01112524236
01228033601

فى مسابقة شعر العاميه

هو مين فينا اللى مات

كل يوم
بسال ندا نفس السؤال
ومفيش جواب غير سكتها والسكات
بسأل البيت والحيطان
والجناين والغيطان
بسأل الشمس اما تشرق
واسأل الليل لما يجى
بسأل الارض اللى دوسنا ف يوم عليها
وانتى ايدك ماسكه ايدى
هو مين فينا اللى مات
برضو ماسمع غير سؤالى والسكات

هو مين فينا اللى مات
بسألك جاوبينى انتى
احنا مين فينا اللى مات
هو انتى ولا انا
اللى اندفن تحت التراب؟
هو اللى اندفن تحت التراب
ولا اللى عايش
زى مايكون وسط صحرا
لما يعطش
يروى يأسه م السراب
واللى عايش ف العذاب
واللى طالعه الكلمه منه
طالعه بتدارى الاهات
يبقى مين فينا اللى مات
لسه حاسك جوا حضنى
شايف الدنيا بعنيكى
بس كل الكون رافضنى
رافض ارجع الا بيكى
بيقولوا لى يا ندا
انتى اللى متى
بس انا مجنون بدور
كل طلعة شمس بسال
يا الاماكن اللى ليها فيكو ذكرى
جت زارتكو
حد منكو عنده كلمه تطفى نارى
واما بيذيد انتظارى
واما بيمل السكات
برجع اسال نفسى تانى
هو مين فينا اللى مات

كل ضحكه من شفايفى
رافضه تطلع
حالفه تسمع قبل منها
ضحكه ليها
خطوتى ع الارض تاهت
زى مايكون
كنت بمشى بنور عنيها
كل نجمه ف السما
رفضانى امشى لوحدى مره ف ضيها
والقمر نوره اختفى
حتى مهما الشمس تحمى
لسه مش حاسس دفا
لسه حاسس نبضها
سامع الكلمه اللى عمرى ف يوم
ما حاسمع زيها
لما كانت يوم تحس الفرحه كانت
تيجى تجرى تقولى نفسى
قلبى يبقى جوا صدرك
لاجل انت اللى تملى تحسها
لاجل يبقى النبض واحد
لاجل يبقى العمر واحد
لسه فاكر كل كلمه
لسه سامع همسها
بكلمه بحبك
بس مش عارف
ليه بتسكت بعدها
هى سكتت
ولا انا اللى ماعدت سامع غير سكات
نفسى الاقى حاجه تنفع تتسأل
هى ماتت ولا انا
مين اللى عابش فينا
او مين اللى مات
حزنى يصرخ ف الشوارع
والسواقى
والسنابل
والشجر
كل شئ من بعد منها
زى مايكون انتحر
كل شئ ماعدش
يسمع
او يجاوب
او يحس
حتى وردة زكريتها
شوك و بس

حزنى ينده ع الشوارع
شط يرفض يوم يجاوب
حزن يصرخ
بحر ينكر انه سامع
صوت كنارى
كان بيملى البيت اغانى
ياندا والله بعدك
ما فى مره سمعت منه
غير نواح الرد طالع
ليه أغنى ؟
ماللى كانت يوم بتسمع
قالوا ماتت
حزنى اقسم ع الشوارع
ليل سكاتك
مهما يطول
والله ماقبل صبح طالع
م الليله دى
احسبى ليلك سنين
مش ساعات
بس برضو كل شئ
لساه مصمم ع السكات
وانا برضو لسه بسأل
هو مين فينا اللى مات
واسهر اندهلك
وانا عارف
لا هتردى
ولا سامعه
ولا ممانعه
لكن بس الظروف مانعه
تجاوبينى
وبشتقلك
وانا عارف
بعيده النظره عن عينى
ولما توحشينى
اجرى اغمض عينى
واسرح
راسى تسند حزنها
فوق كتف طيفك
طبطبة ايد زكرياتك
لما واست
قلبى نام
روحى شافت ف المنام
نور .وجنه
شالك البايت ف حضنى
كان بيضحك فوق كتافك
وانتى هله
والكنارى لما شافك
صوته صحى فرح بتنا
لما غنى
حور محنى طرف ديل فستانك الابيض اديها
مسك غاير من عبيرك
تاجك المرمر ينور
لما اشجار نبق تمنع
شمس تمحى
ضله ديما فرشهالك
والهوا باعت نسيمه
لاجل مايغازل ف شعرك
ايدى تسبق ريحه تخطف
طرف شالك
اجى اكحل نن عينى بنظره منك
تمنعينى
ورد شالك ينفرط جوا ابتسامه
لسه باقيه من معادك
والسنين الباقيه منى
ينتفض فيا الوجع
وارجع اشرب من سؤالى
مر كاسى
اصحى ميت لسه عايش
خايبه ايد الذكرى مابتعرف تطبطب
او تواسى
اطلق الصبر
اللى حابسه جوا منى
صرخه تطلع ف الشوارع نتندهك
تلقى عشق بيندفن
من غير كفن
او حتى قبر
موت بيبعت فى سنين العمر انفاسه
ونبض الموت
اذا مس القلوب ماتت
واذا دق ف وريد قلبى
بيحينى
فلاقينى
على اعتابك
تقومى تفتحى بابك
تلاقينى
تضمينى
فاصرخلك بعلو الصوت
وحشتينى
وحشتينى اوى