فى طلّة الشمس البهيه……….كنتِ هي.
كنتِ صاحيه وصوت صباحك فوق عيدان المشربيه
صوت بلابل .صوت سنابل
صوت مقابل كل طرح النيل وشايل
كل معنى الحب بينا بأيد سخيه.
كنتِ هى فوق زمان المستخبى وراح يعبّى
من صباحك كام هديه.
دا أنتِ باب الكون دا كله
قلبه دلّه وفكره قال له
لويخطى الفجر خطوه
راح تخطى قبله ميه.
دا أنتِ بنت الفخر
جدك كان سواقى
بين شراقى الأرض ساقى
للحضاره.من علوم الإنسانيه.
فوق جبينك ياحبيبه
راح يزينك ألف ساتر للكرامه
وفيه علامه إنك أبيه..
دا انتِ دايما ياصبيه
ليكِ نيه
ومشتهيه
إنك تكونى ومعجزاتك
فوق سطور العمر ذاتك
لو سكاتك مره فاتك
راح تكونِ الصرخه فيا
طرف توبك لو يعدّى
فوق جبين الأرض يدّى
ألف مدنه وألف غيّه.
حتى شالك يوم ماشالك
فوق نجوم الكون ده كله
كنتِ حره فى قلب درّه
كنتِ جوه السنبلات الصفر رحمه
كنتِ بسمه
ونبع صافِ للوصيه.
لو فى جرحك طرح فرحك
بين أراضى الخوف نادانى
راح يعانى الليل مكانى من الأسيه.
ياجميله وعين كحيله ومستحيله ومش شقيه.
ياحبيبه فى رسم طيبه ومش غريبه
لو ينوبك من الحكاوى ألف صفحه…مش قضيه.
لو ذنوبك عشق زايد فوق غيطان الحب فرحه ..مش خطيه.
لو فى ليّه دين عليكِ
روحى ليكِ م الفريضه ومش عطيه.
ماتحرمش العمر منك ياصبيه
علمينى حروف ترابك
علّى بابك
وارسمينى فوق كتاب العمر صوره
أو ضروره.
بين حروف الأبجديه.
ولملمينى فى ضىّ عينك
وابعتينى لكام حوريه
وابعتينى لكام حوريه
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
