واتقلب الشعر على الشاعر ..للشاعر/ إيهاب يحيى أبو طه

واتقلب الشعر على الشاعر
وبقيت شطرين
أولهم صدر على الشارع
فارد دراعين
فاتح شباكه على الاخر
والروح بروحين
بيفرفر م الضحكة الصافية
ولا داقش انين
والتانى العجز من العتمة
بيرافق أأأه
مخنوق بالدمعه ومش فاكر
السكة منين
وانا بين الاتنين ميمون برقص
على تلج ونار
بكتب واتمرجح لأ .. وابكى
بعويل وهزار
والنور جوايا خيط اسود
والسهرة نهار
واهو طول اليوم زحمة ف قلبى
وشقار ونقار
وبحاول اعدل وكانى
انا جوز الاتنين