قصيدة / وبتلكك عشان أفرح
الإسم / دينا السيد لطفي الدسوقي
من محافظه دمياط
إسم الشهرة دينا لطفي
فيس بوك / دينا السيد لطفي
وبتلكك عشان أفرح ‘ وأنسي ‘
الجرح والأحزان ‘ ‘
وبرسم ضحكه علي وشي ‘ فقلبي
يبان لكم فرحان ‘
وأقول بالكدب مبسوطة ‘
وأصدق روحي مهما يكون ‘
مجايز ( بكره ) يصدقلي ‘ وأشوف له
نهار بأجمل لون ‘
باقوم من بدري أمضي حضور ‘
وبعمل من – الأمل – دفتر
ما أنا بروح ‘ حلاوه روح ‘
أجيب الصبر بيه وأفطر ‘
وأدور ليا علي كرسي ‘ في وسط
قلوب كتير بتدوب ‘
ألاقي مافيش ‘ ألاقي ياناس
مكان ‘ الكرسي قالب طوب ‘
محاوله بجد مش أكتر ‘ بحاول فيها
علي قدي ‘ .
ماأنا اللي بعيش‘ يادوب سرقة ‘
دقايق – فرح – وتعدي ‘‘
جراحي خام ‘ ومختومة ‘ بختم
النسر في الباسبور ‘
وضحكة وشي في الصورة ‘ مجرد
شكل بس ديكور ‘
ياعم الحج أنا بضحك ‘ لكن القلب
فيا حزين ‘ دموعي واقفه بشناطها
وجاهزه جنب باب العين..
ورغم الغلب ‘ وعذابي ‘ ورغم دروب
خلفها النصر ‘
بعيش الضحكة ‘ مع إني في قلبي
وروحي مليون كسر ‘
مابستسلمش لوزادت ‘ في يوم
أوجاعي ودموعي ‘
بجيب الضحكه لو من فين ‘ وأقيد
من ضيها شموعي ‘
دا مهما القلب يستكفي ‘ من الأحزان
بحاول أعيش ‘
معايا ربنا فإزاي ‘ أنادي غيره
مايسبنيش ‘
محدش فينا ‘ كان قاصد ‘ يعيش
في الكون لوحده يتيم ‘
فمش بإيديا أصحي في يوم ‘ ألاقي
عذابي دا الأنتيم ‘
شروخ في القلب مش باينه ‘ وياما
بتدارينا هدوم ‘
مافيش في الدنيا حال دائم ‘ دوام
الحال ده شيء معدوم ‘
بطبطب ياما علي نفسي ‘ وأشيل
بين حضني ‘ صبر كتير ‘
وأنام عادي ‘ وأقول يمكن ‘
يكون بكره صباح الخير ‘
يكون بكره صباح الخير .
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
