بقالك مدة غايب عنى يا ترى مالك .. قلقتنى !
تكونش لسة زعلان منى ؟
و سايق دلالك ..
و عشان دا كله خاصمتنى ؟
على فكرة بقا ..
وحشتنى !!
عمالة أفكر فيك .. و لسة
بسأل نفسي عن أحوالك
برغم ان انت ظلمتنى
تلاقينى أصلا مش على بالك
و لا فكرت تسأل عنى
ما انا اللى روحى ليك رايحالك
من ساعة ما انت سبتنى
ما تقولّى بس ايه اللى جرالك
أوام بسرعة كرهتنى ؟
نسيت خلاص إنى حبيبتك
و إنى ياما غفرت ذنبك
و كنت كل مرة تغلط ..
قلبى كان دايما يسامحك
خلاص ما بقتش تحبنى ؟
دا انت اللى منى ..
و انا اللى منك ..
أنا الوحيدة اللى باقيالك
كفاياك قسوة .. تعبتنى
تعالى يالا انا مشتاقالك
إرجع لحضنى و ضمنى
وحيات عنيك انا محتاجالك
بالله عليك ما تصدنى
و اوعى تنسي ان اللى بيننا
مش مجرد حب عادى
أصلك انت لو نسيت ..
قلبي مش راح ينسهالك
و تبقي حقيقي صدمتنى
هو إنت بجد عشقتنى ؟؟
أقولك حاجة …
أنا خلاص قلت اللى عندى
و ما عادش باقي من الكلام
غير كلمة واحدة و حـَ اقولهالك
إنت بـ بُعدك عنى فعلا قتلتنى
آه صحيح ..
فكرتنى
نسيت اقولك ..
إنك بجد وحشتنى !!
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
