وصية إلى أختى قصيدة للشاعر / محمد البدراوى

مكتوب على الظرف

من بره

( أختي العزيزة )

أختي العزيزة بوصيكي

وصية

بكتبها ليكي والدموع

ماليه عينيه

هتشوفيها وهتسمعيها

وهتعرفي إيه اللي بيا

قبل يا أختي متفتحيها

هقولك تاني دي وصية

بلغي أمي سلامي

وعنها متسكتيش

ولما تسمع كلامي

قوليلها ما تبكيش

وان كنت ضايقتك يوم

يا أمي متزعليش

يا أمي متزعليش

أخدته وضميته لصدري

شميت فيه ريحة أخويا

وافتكرته الصبح بدري

لما كان يصحى يجري

يصحى يحضن أمي وأبويا

كنت أغير منه وأجرى

واتعلق في دراع أبويا

أبويا راح وسابني

دلوقتي راح أخويا

دلوقتي راح أخويا

أخويا مات والدمع

في عيوني

وحزن أمي وحزني

هدوني

الضحكه راحت

وآهاتي صاحت

واتغيروا شكلي ولوني

إتغيروا شكلي ولوني

فتحت الظرف ولقيت

ورقه وياها شريط

وصوره لينا في البيت

مرسومه لسه ع الحيط

غمضت عنيه وبكيت

لما الألم بيه حسيت

وقلت ياريتك ياخويا

ترجعلي تاني ياريت

ترجعلي تاني ياريت

أمي جات سندت عليا

ودموعها سالت بين إيديا

وبلهفه قالت إقري الوصية

وكانت أول كلمه مكتوبه

أختي

أختي العزيزة بوصيكي

وصية

خلي بالك من أهلك وناسك

واوعي تنسى أمك وأخوكي

خلي عقلك جوه راسك

وافتكري دايماً بيت أبوكي

هما ليكي وانتي ليهم

وافرحي يا أختي بيهم

قربي منهم واسعديهم

وشيلي الدمعه من عنيهم

هما ليكي وانتي ليهم

أمانه عليكي يا أختي

لما أولادك يكبرو

عرفيهم

بيت أبوكي وعوديهم

علميهم

مايسبوكي وفهميهم

فكريهم بحب أبوكي

وكبريهم

واوعي من حضن أمك

تحرميهم

فكريهم يا أختي بيا

سمعيهم مني الوصية

وارحميني في الممات

وف سجودك إدعي ليا

أختي العزيزة