يا لاعن الدنيا .. مسابقة شعر العامية بقلم / عبدالرحمن اسامة الزرقا

عبدالرحمن اسامة الزرقا

[email protected]
الدولة مصر
شعر عامي
(يا لاعن الدنيا )
__
يا لاعن الدنيا
العنها عني كمان
دي الراحة لو ثانية
تلقى الوجع اعوام
يا لاعن الدنيا
العنها والعني
واحكي لولاد الاغنيا
عني
انا كنت فارِح
والفرح باعني
يا نخل طارح
الطرح جوَّعْني
سقيت النخل بالفرحة
سقاني النخل بدموعي
لا عمري شبعت من الفرحة
ولا كفى الفرح جوعي
ده ليلي بينتهي عالليل
ومن الضيِ اخدت قليل
يا بياع الكلام غنِّي
دنا بعشق غنا المواويل
شكيت للبحر عن حالي
وجعت البحر ووجعني
وغنى الموج بموالي
وموج البحر ما يساعني
كتبلي رسالة جوه ازاز
يا ابني الفرح اصله مجاز
ادعي ربك . بالثبات
واغتسل واسجد وتوب
ده الدنيا دي متهات
والفرح ده مكتوب
حب الحياة تفرح
افرح وبكرة تحب
ازرع امل يطرح
ادعي وقول يا رب
يا موزع الافراح
انا اول الزفَّة
ياموزع الاحزان
انا خدت دول كفَّة
يا موزع الارزاق
ارزقني بالعفَّة
وانا بيها اتكفَّى
يارب يا كافي
طبطب على كتافي
انا عايز اتدفَّى