ط
مسابقة الشعر العامى

٣ قولات .مسابقة الشعر العامى بقلم / عادل شوقى إبراهيم .مصر

خاص بالمسابقة مهرجان همسة
الفئة/شعر عامية
الاسم / عادل شوقى ابراهيم
العنوان جمهورية مصر العربية _محافظة سوهاج _مركز اخميم
رقم الهاتف ٠١١١٣٦٥١٩٧٥
_________________
(٣ قولات)

٣ قُلات من الفخار وكوبايه

وزير مليانه في الذنقور

ولمبة عويل تقيد ف الليل

وحَبل غسيل في صحن الدار

حَصير مـ الحلف مفروشه

وكانون قايد علي المنطال

في قلبه الفول

خلاص قرب على الطيبان

عيال زايطين

هدومهم من الغبار والطين

خـــــــــــــلاص جعانين

ومش صابرين

وأم تدادي وتحايل

فى طشت غسيل

وأب في قاعه بيقيل

يدوب ساعة

وتبقـــــي الضحكة شمـــــاعة

لهم تقيل

وفرن فـــــــــــوق سطوح البيت

وجرن وقيد

وكام بطه بيسعوهم

عشـــــان رمضان وزنقة عيد

وباب البيت ما يتردش

يجى الســـــــائل ما يتردش

وناس مش خايفة من بكره

ولا عاملة حساب للخوف

قلوبهم ســـــاكنه في عينيهم

وبيها الشوف

طيبتهم شيء يحليهم

جمال روحهم مغليهم

جميله الدنيا حوليهم

وعقب الليل يردوا الباب

حيطان البيت تدفيهم

ويكفيهم قليل مـ القوت

وساعة الموت

بيبكي كل شيء في الدار

وينعيهم

وفجأة الدنيا تتغير

بناس تانين

بناس رافضه تكون منهم

بقوا تايهين

لا وصلوا لبر ولا عرفوا

يكونوا للي فات راجعين

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى