ما أصعبك لما تسافر نظرتك فى الكون لفوق فتمطر الدنيا وجع
لما تكون الدمعه
لسه بتتولد
ومخاضها سهم بيتعبك
ما أصعبك
بتخبى ليه الصرخه
فى أدراج الضلوع
القلب ده من اى نوع
قادر بسكتة
انه يهد الكون ألم
ماهو كان بدقة
يشد روحى ويسعدك
والدمع ده
لو سبته فيكى
يدوبك
ما أصعبك
وأنا اعمل ايه
والسم لسه بيجرى
بيهد الحيطان
اتكلمى
ضلك بينهار جوا عينى
وعاجز انى أسندك
ما تسلميش
محتاج حروفك
من شفايف زرق
محتاج نفس
يطلع بآهه تفوقك
جايز يسد الفرق
صعبان عليا
انى أدوق البرد
وسنينى العجاف
وانت اللى حضنك
كان دوايا ومشربك
ما أصعبك
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
