علميني ..قصيدة للشاعر / رفعت السنوسى

علمينى
ازاي أشوف المسألة
في كل نظرة وكل فكره
ومُعْضِلَه
جوه قلبك واحضنيني
وازرعي الفرح ف سنيني
وعلميني
علميني ازاي ما اعيش
جوه قهر الوحدة مَره
علميني بصبر ادوق
جوه بُقْي لُقْمَه مُرَه
وازرعي الفرح ف سنيني
وعلميني
علميني
ازاي اشوف لحظة سلام
تنطق الكلمة العفيه
تملا كل الكون علام
علميني ازاي ماخافش
مره بطش لأي ظُلْم
علميني احمي الضعيف
واحمي جوه الفقر حلم
وازرعي الفرح ف سنيني
وعلميني
علميني يا حبيبتي
إني اكون في عز ضيقتي
نور أمل للشقيانين
علميني أكتب طريقتي
إني أرفع شرفي سيرتي
وسط آوجاع السنين
وازرعي الفرح ف سنيني
وعلميني
علميني
إنك انتِ أحسن صديق
ضحكتك في الليل طريق
علميني الإنسانية
علميني اكون بريء
…………………… الأديب رفعت السنوسي