خاص بالمسابقه .. عامي ..
.
.
بمناسبة عيد ميلادي .. قررت أقول لنفسي كل سنه وانت طيب
– القصيده عامي وفصحي .. لذا وضعت الفصحي بين أقواس
+18
ـــــــــــ
تمّيت 18 سنه !!
والحمل زاد فوق الكتاف ..
حملين كمان
تمّيت 18 سنه !!
والعمر قرب ينتفض
يلحق يكمل رحلته ..
قبل اما يصبح بهلوان
تمّيت 18 سنه !!
والصبح طالع من على جنب السرير
مادد إيديه ..
عمّال يقول
– مبروك يا عم الهندسه
عدّيت خلاص والصوت طلع
وبقيت كبير
– دي سنين بتجري يا عم صبح
بتحني ضهر الشاب بدري ..
متخليهوش عارف يقف !!
واهو كل ما يعدي الزمن
بتلاقي هذا القلب زاهد معتكف !!
( وَعَلى حَسَب هذا الوَرَق
فأنا نضَجتُ مبكراً )
دي سنين بتتقطّع ..
وتجري
والنتيجه المداريه تحت كوم الذكريات ..
جايبه الهديه !!
وشهور تفوت خلف الشهور
ولا حد داري
بمين يعيش !!
أو مين يموت !!
أو مين في اول ما اتولد ..
قرر يعيش دور السكوت !!
( مَا عَادَ يَنفعُ كُلّ هَذا الحُمْقُ
يا صَاحي )
وعلى سبيل دنيا الصُدَف
أنا عيد ميلادي جه في يوم
المعجزه !!
للرب آيات في السما
ضعفت عزايمك انما
لسّاه بيخلق ميت طريق ..
تسلك إليه
شوفت الكسوف ..
ويا الخسوف ..
والناس تكبّر للملك ..
( يَارَب هَذا الكَونُ تُبنَا ..
فاستجِب ربَّ العِباد )
والرئيس وسط المحاكمه ..
قام وقال للقاضي اسكت !!
انت لسه تحت ايدي ..
فاحترم قرارات رئيسك !!
الحقيقه ..
المزايده ع البشر
كترت أوي
ولا حد عارف مين بيحفر بير لمين !!
ولا حد شايف آيه للحق المبين !!
وإمام جامعنا بيدعي للقهار بدمع ..
( يا مالكُ الأروَاحِ
ضاقَت رَوحُنَا
مِن هولِ أحدَاثِ الفِتن
أوقِع جُيوش الظَالمينْ
بالظالمينْ
واقبُضنا يا مَولايَ عندكَ سَالمين )
فيردد المأموم
آمين
وكمان في عيد هذا الميلاد
( إذ فَجأةً )
ألقى الشوارع اتملت أحمر كمان !!
فكّرت حد وقع فحد فجابه تحت الونش مات !!
عادي بقى !!
اتفاجئ ان الناس بتعمل فلتنه !!
يا فرحتي ..
طب هيا ناقصه كمان سواد !!
ما كفايه كسوف ..
وخسوف ..
وآيات ..
ورئيس يتحاكم كده علني !!
زغرتي يا بلدنا يا محتاسه !!
عندنا رئيسين جوا الزنازين !!
والناس بتفلتن في الشارع ..
شايلين دباديب
وقلوب حمرا
وانا قاعد بتملّى فـ أوضتي !!
واتأمّل في السقف وابحلق !!
وبسقّي الشاي ويا الفينو ..
فسامحني يا عم فلانتينو ..
مش هتفلتن !!
أحسنلك تتنيل تقعد ..
وتبحلق في السقف معايا ..
وتجيبلك شاي في الكوبايه ..
وتسقسق زيي وتتمزج
أنا عقلي خلاص هنّج منّي !!
مش عارف حتى أطمني !!
والعيد أصلا مبقاش عيدي
فتعالى اتنحنح وساعدني ..
وأطلّع مـ الدرج نتيجه !!
( فعَسَى أيَامي تُفرحني )
وأطلّعلي بطاقه جديده !!
#أحمد_فهمي
