لمسابقه العاميه
قصيده بعنوان “ميت عاش ”
أنا واحد طيب جدا
ملهوش ف نفاق ومصالح
أنا حد مغامر لكن
بيحب وعمره ما صارح
انا يمكن عايش بكره
مع إني بموت ف امبارح
أنا حد بيفضل سارح
ف الخلق وف الملكوت
جوايا أنا عيل جدا
بيخاف من سيره الموت
ويخاف إن نام مبسوط
يصبح بالقلب عليل
وإن فكر مره يحب
بيخاف ليطب قتيل:/
أنا من مواليد إبريل
هذا الشهر الكداب
إكمني بسرعه بشيل
أنا اكتر واحد ساب
انا فاتح كشف حساب
لوشوش بتعدي فلاش
والبنت ال انا حبيتها
ونسيتها ومنسيتهاش
ومصايب كنت عاملها
نفسي ارجع معملهاش
أنا يمكن اكون بكاش
بيستف كل مشاعره
ويفرق فيهم كاش
انا حتي مبستناش
يجمدلي ولو خمسايه
كل ال ف جيبي معاكوا
كل ال معاكوا معايا
انا سكر ف الكوبايه
بيموت لجل ما تحلو
أنا عاشق اوي للّمه
والعطف ب”و” مش “أو”
وبحب برود الجو
والسقعه ف ليل امشير
والجري ف عز المطره
والقعده قصاد النيل
وان اسمع صوت فيروز
مع قهوه ببن تقيل
انا نفسي اعيش من غير
لعبه مكسب وخساره
من غير ما بفارق ناس
إن كان أحمد او ساره
من غير ما يهدوا طموحي
ويعلوا قصاده عماره
أنا شايف بالنظاره
خيالات بتروح وبتيجي
أنا سامع صوت احمد
بيقولي يا عم ما تيجي
هنا احسن اوي من عندك
بكفايه الدنيا تعاندك
وتفرط فيك ببلاش
وسامعني برد عليه
وانا بضحك م الإفيه
مفضلش كتير يتعاش
أنا واحد ف الانعاش
كان ميت اكلينيكيا
وبقدره قادر عاش
قلم / امل عيد
