انا وانت وشوية حاجات
والذكريات والشعر
كانوا وسطنا
قاعدين بنحسب عمر فات
بس السكات شاور لنا
انا النهارده مش هنا!!
ضحكت سنين
والشعر قال يا عم روح
وانا وانت شفنا بعضنا
النظرة بصرة ف ثانيتين
لكنها دهر امتطى
صهوة حصان المستحيل
وانا وانت ويا الذكريات
والشعر يجرى جنبنا
ولحد أول كلمتين
فى الشات لقيتنى بكتبك
اختى وحبيبتى وصاحبتى
امى وعكاز الزمن
جربت فيكى البحور
فغرقت من صدر القصيد
مع ان حظى من دهب
لكنى مش بعرف اصيد
والشعر فوق الشط
نازل نحت بيعد الشعور
عمال يدون ذكريات
عاشق وخيبتى طافة م الكفة
ومضيع المركبة ومتوه الدفه
والشعر زودها قوى
خلا الديوان زفه
ياااااااااااااه ع السنين
انا قلبى شايل منه ومعبى
لكنه رغم الاسى يفضل اكيد صاحبى
يكفى انه جابك هنا والحضن كان مبتور
دمعك عزيز يا شعر ارجع بقا قلبى
فى اللحظة دى ما فاضلش غير انت
والذكريات قاعده بتتربص
نظرة عنيكى باينة طمعانه
والذكريات حيرانه ويانا
مكتوب على وشك
فى الغربه لما سبق سيف الفراق لسنين
مالقيتش غيرهم ونس وانا دايبة وسط حنين
لا شفت مرة جواب ولا شعر كان بيفيد
فحلال عليكى الذكريات والقسمة كده نصين
ما فاضلش غيرنا
نظرة عنيكى لسه رايحه ف سكتى
ومن التجارب عارف انك قطتى
وعشان عيونك قلبى جحرمن الفيران
وبدل جيران هعمل ضلوعك شقتى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
