ط
الشعر والأدب

العيد خلص . قصيدة للشاعر / محمد زهران

العيد خلص

والبيت فضي

كل الحبايب روحوا

البيت فضي

والحزن راجع مطرحهُ

إيه اللي ممكن يتعمل

سكي البيبان واملي القلل

قومي افتحيلنا التمثلية تشتغل

ياااااااه ع الملل

والنشرة جاية بعدها

ونام وبكره نعيد ف كرّة شكلها

ربك كريم ب الموت قريب هيحلها

جينا فرادا ف فجرنا

نزرع بذورنا وحلمنا

وعيالنا تكبر جنبنا

كبروا وراحو وضللو

برا حدودنا وأرضنا

ورجعنا تاني المبتدا

اليوم ملل والبيت فضا

بيرن فيه صوت الصدي

يا دنيا ليه طعمك كده

حنضل وموالك كدر

بس اسكتي ما اسمعش لومك ع القدر

مين اللي قال انّ الشجر

جذعه يسيبه لو كبر

هما الملاذ وقت الكبر

إن مال يا حاجّة بيسنده

ضحك الجذوع بيجدده

علّ الاذاعة وشغلي

رفعت هيقرا م الحجر

نسمع يا ستي ونعتبر

ليت الشباب هيعود بإيدي وهمسكه

واعمل ظروف للوقت دا بتريحه

العيد خلص والغلب راجع مطرحه

 

#محمد_زهران

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى