ط
مسابقة الشعر العامى

قصيدة : حرف الألف . مسابقة الشعر العامي , بقلم / أحمد ربيع سليمان ( النخيلي )

(حرف الألف)
حرف الألف ما مات خلاص
ولا عادش شعر ولا أدب
ومفيش ثقافة بقت يا ناس
ولا عدتش أسأل ع السبب
مات !!
مين اللى مات؟
حرف الألف
إيه السبب؟؟
بيقولوا كان ماشى
وشاف المعنى أصبح
مختلف
وقع إنكفا
وعلى القفا
راح انكسر
داست على الهمزه البشر
ضاعت معالم خطوته
معادش يعرف سكته
فوق السطور
مات منحرف
حرف الألف
وسوق الأدب ناقص أدب
والسلعة صبحت عهر
يا تقدموا شىء مبتذل
ومفيش رواج للطهر
واللى بيشرى الحرف تور
ما يهمو غير المهر
والمستمع …
يا إمَّا جاى على شان إشى
يا إمَّا ما بيفهم فى شى
وتشوفه قاعد قال برم
فاهم وعامل منتشى
مش عيب على بتوع الأدب
يبعوه دا للى ما يختشى
والحرف …
مات ومفيش عزا
ولا فيه صوان مفروش لذا
ومفيش خلايف تُنصُبه
من تانى هىَّ تِنَصِبُه
غير بس أولاد السفاح
اللى ملو السوق هرتله
صالونات مودرن مفصله
على مقاس الإكس لارج
والمعنى أصبح دا سوفاج
والله يا شوية نعاج
اخرتْ حروفكو المزبله
ولابد يوم سوق الأدب
ما يعود يحل المعضلة
ويقود شعاع كل الفنون
ويكون علم فى كل لون
ويعود كما ف عصرِ هارون
دا ليه كرامة ومنزِله
#حماده_النخيلى

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى