كـــــــــــون ماتكـــــــــــون..للشاعر / على مدكور

===============
كون ليبرالى .. كون اسلامى
كون ماتحب وماتخبيش
عيش بطريقتك فرض وسنه
صون الجيره .. وسيبنى اعيش
اعبد ربك .. مجد سيدك
صلى وقوم .. او ماتصليش
كل ايمانك لك مش ليا
عند المولى ماينفعنيش
يبقى بلاش تختار لى حياتى
ع اللى تحبه ماتجبرنيش
فوقنا اله هو اللى يحاسب
ع الخلافات ماتحاسبنيش
وبلاش تفرض معتقداتك
على افكارى ماتقتلنيش
ليه ف الفكر بيتهيألك
فكرك صح وغيره مفيش ؟
اسمع منى بصفتى شريكك
ف وطن حالم نفسه يعيش
امن الدوله مالوش ف المله
فبلاش تكره شرطه وجيش
كون ليبرالى .. كون اسلامى
كون ماتكون … وماتكرهنيش