الإسم : دينا السيد لطفي الدسوقي
إسم الشهرة : دينا لطفي
محافظة دمياط – مصر
نوع المشاركة : الشعر العامي
إسم القصيدة : علي جنب يا أوسطي
علي جَنب يا أوسطي
مش عايزة أكمِل في المِشوَار ،،
مش عارفة إزاي إنتَ مِحَمِل ،
شياطِين الإنس مع الأبرار ،،
هانزِل علشان مش عايزة أشُوف
الشَكل المُؤرِف للتعَابين ،
وأفْضل أتلفِت في السِكة
وأبُص يا أوسطي شِمال ويِمين .. .
معلش أنا حَالفة علي المُصحَف
مأزرعش الوَرد في أرض البُور ،
فاكلامي معاهُم مش مُجدِي ،
ولا عُمرُه هايِطرَح أي زُهور ..
أدي الطَرطور راقِض عـ الكِدب ، والوَضع يكَفر ويِحَزِن ،،
أنا عُمري ماشُفت يأستاذنا
الفاسِد واقِف بيأذِن ..
القلب مِخَزِن مش قابِل ،
ولا طايِق أجَواء الهَذيان ،،
رُكابَك حتي مافِيش فيهُم ، واحِد
يِتلقب بالإنسان ..
الكُل مُوالس للخَونة دَايسين بوقاحَة
علي الغَالي ،
وبتَاع مَصلحتُه مِكبرها ،
وبيضحك ويقول أنا مالي ..
وأنا مش بِيحلالي إني أتفرج
ياجَناب الأوسطي علي الأندَال ،،
علي فِيلم إتمنتِچ ، وإتقصقَص
والحَق في غَمضِة عِين إتشَال ..
أرجوك نَزلني أوام في الحَال ،
أصل الرَكاب بضَمير مَنكُوش ،،
مش عايزة عينيا تِشيل أخطاء ، أو ذَنب
يا أوسطي ماعَملتُوش .
