وانا صدرى وياكى انشرح
ياللى انتى ايقونة فرح
وبحور ومرسى ع الشطوط
فيه المراكب حاضنه طراطيف اليخوت
…..
خلينا متفقين
ان انتى ضى العين
وانك يا نبض القلب
الحلوه بزياده
……
ياللى وجودك
أجمل عاده
بعشق قلبك
وانتى بتعشقى صوت فيروز
والقهوه الساده
……
انتى جمله بين قوسين
انتى (هرمون السعاده)
……
وانا
سهران وطول الليل
فارس وصاحبى الخيل
بلمح نسيم عطرك
والقلب ليكى يميل
ويامحلى دى عاده
……
حاضن بساط الريح
وانتى صلاة تسابيح
ع الصدر احلى وسام
وزينه وقلاده
خلينا متفقين
انك يا ضى العين
الحلوه بزياده
…….
آااااااااااااه ياللى صوتك عزف
مكانك عندي ومكانتك
يفوقوا الوصف
…….
ياخاطفه القلب من صدرى
وبيكى بيعلى انا قدرى
منين جيتينى لا أدرى
وماده الكف
…..
انيقة القلب والطله
ومستغناش انا والله
وجودك فى المكان خلى
دماغى تلف
…….
قلم شخبط فى افكارى
وفتش فى اللى مدارى
ياقالبه ليلي لنهارى
نسيم فيروز من صوتك عليا هف
…..
مفيش زيك
مفيش زيك
ولا ف وصفك
بنات الدنيا لو جُم مره يتصفوا
لاهيكفوا
ولا يوفوا
ولا يجيبوا عبير كفك
……
وانا اختارتك
ويااااااااما وقفت فى صفك
خليتك وشاح ليا
على كتافى
وقررت ان أنا ألفِك
بيرقص قلبى من الفرحه
ويحضن قلبك الشفاف
ويزِفك.
……
ياخاطفه القلب من صدرى
وبيكى بيعلى انا قدرى
منين جيتينى لا أدرى
وماده الكف.
…
خلينا متفقين
ان انتى ضى العين
وانك يا نبض القلب
الحلوه بزياده
…
الشاعر أحمد عبد العزيز بريقع
قصيدة هرمون السعادة
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
