قصيدة: أَعرَج ..مسابقة الشعر العامي .بقلم / يحيى عباس

الإسم : يحيى عايد عباس فرغلي
إسم الشهرة أدبيا: يحيى عباس
دولة مصر ، محافظة الشرقية ، مدينة العاشر من رمضان
رابط الصفحة الشخصية :https://www.facebook.com/yehya.ayed.abbas.33
فرع الشعر العامي ” شعر العامية ”
إسم القصيدة: ” أَعرَج “

دايمًا فـ كُل جريمة سموني هابيل
ماليش شبيه فـ الدنيا دي وماليش مثيل
مشكلتي حاجة وحيدة مانعاني الوصول
أعرج بزك برجلي..فاهديها السبيل
مكمِّلِتش طريق لحد امَّا انتهى..
وكإِنَّهاَ متعطرة ببرفان رحيل
بس اللي يبسط.. رغم زكتها انها..
متشطرة على كل عقبة مستحيل

عافرت والتجاعيد خدت من جلدي بُؤجَة..
عديت بقلب ضرير وجسم بتاكلُه فُرجَة
روحي دولاب والخلق كانت داخلة ، خارجة
بيدوسوا على رجلي ولما انطق يقولوا:
“ليك نفس تتكلم كمان يا ابو رجل عارجة!”

لِساَّني بمشي لذكريات متفلسفة
تشبه لشمس كئيبة ما بتجيش فـ ليل!
مشرباني الدَّاء..وبتقول بالشفا
قاتلة بتمشي بخفة فـ جنازة القتيل
منافقة أكتر مـ اللي ادَوَّرلُه القفا
فينتقم مني بدون ما يسيب دليل
زي الصحاب لما بيتباهوا بسَفَه
بيا فـ صور..لكن نفوسهم مش تميل
ديني لنفسي حنين..ودينهم كان جفا
لو سيبت ليهم روحي هيقولوا : بخيل

مالي أرى الأحلام بقت كوابيس فـ فيلم..
لما سعيت اليأس حاوط كل جيهة
سفن النجاح هربت بعيد عن مرسى بري
موج الفشل جيه شدني بسرعة بديهة
حل السكوت فـ الأزمة أفضل حل هاخده
وهسيب حقوقي للي متبلطج عليها
الفيلم ده هو الحياة..بطولتها مُوت
أكبر كابوس ده إني عايش لسه فيها!

الماضي بيعاتبني على رقة مخالبي..
بيقولي يا اهبل! يا اللي فِكرَك فِكر سلبي
بتشد إيد اللي اشترى وجعك يا بيه!
يا علقم الحكايات بلاش تكسر فـ قلبي
فكرت رجلي باللي بيكعبلها ليه؟!
كانت بتقطع خوفها فـ الزمن الطويل
دلوقتي حبت خوفها واتناوبت عليه
لما النصيب جه عايرها بالضعف العويل
نازل برجله قصادها..وبيرقص باليه!