ماتقبلشي ……….. تسلم يوم لأوهامك ف عز الضيق
متسمحشي في يوم لليأس دا يصاحبك ويبقى طريق
.
وفين الصبر …. والقوّه
وليه مخبي الوجع جوّه ……….. وتظهر للبشر صوره
ليه أبسط حاجه بتْهتّك
وليه شايل طاجن ستّك …. و فيك كام حاجه مكسوره
.
ماتجمد حبه و استقوي ……. و بطل خوف
و قول للحزن انا الأقوى … و بكره تشوف
.
ولو مهما البشر يعيبوك .. فاكون دايما وتد ع الارض
ياسيدي الورد مليان شوك …. لكن دايما هيفضل ورد
.
وخد مني الكلام واهْتم .. مابتجيبش الهموم غير همْ
لا مره تخلّي جرح يلمْ ………… و لا بتحلّي قولة أه
فا قوم اغسل وجع روحك ……. وصلي ركعتين لله
.
.
دا ياما فوق دماغنا كل يوم .. دقت طبول
و ياما باعوا فينا و خليوا بينا دول و دول
.
فا ان باعك ف السكه حبيبك .. كمل ومتعملش حسابه
من إمتى حياة واحد فينا … وقفت على حد فيوم سابه
.
كان نفسك ف حاجات .. وماجتشي
و الدنيا دي ماشيه …………. بتدبير
و الحاجه …. اللي تخاف قوي منها
والله …………. ساعات بتكون خير
.
دا لسه فيك حاجات حلوه وحاجات حلاوتها جايالك
و لسه ليك اكيد صاحب …….. ف وقت الهم شيالك
فيه لسه خلق من دمّك ……. و دعوه حلوه من أمّك
مفيش و لا ليله عدتها ………….. إلا و هيه داعيالك
.
على كل الجراح خطّي … ومين ف الدنيا دي خالي
و لا تسلّم ف يوم أبدا ….. ل حزنك مهما كان عالي
.
بقلبك …… بص للدنيا بشكل جديد
ومهما .. الحلم هيعاند و يبقى بعيد
.
بإصرارك …….. هتلقى اللي انت نفسك فيه وهتجيبو
ف مشوارك ….. تملي احضن قوي أملك و لا تسيبو
.
وخد مني الكلام واهتمْ … مابتجيبش الهموم غير همْ
لا مره تخلّي جرح يلمْ ………… و لا بتحلّي قولة أه
فا قوم اغسل وجع روحك …….. وصلي ركعتين لله
.
*
*
*
.
الشاعر اللواء / محمد هيكل
