·
أحمد عطا عباس
مصر – مطروح
مسابقة الشعر العامي
قصيدة ” وبعشقها ”
………….
وبَعْشقها
ومش عايز حبيب غيرها
ميلزمنيش
وبعشقها
ولو تجرحني بدعيلها
تدوم وتعيش
دا عودي شَبّ في براحها
وعودي غنَّا أفراحها
ولو يدوني مطرحها
كنوز الدنيا متكفيش
وبعشقها
بحق الحضن والضَّمة
بدون مواعيد
بحق الصحبة واللمَّة
في ليلة عيد
بحق ترابها دا المروي
عرق ، وتاريخ ، ودم شهيد
وبعشقها
بفن جنوبها وأصالته
غُنا ومواوييل
بزرع الدلتا وخضارته
وخير النيل
بنسمة جايه من مطروح
ترد الروح
وتشهد إني بعشقها
بطيبة أهلها وناسها
بأزهرها وكنايسها
مفيش غيرها ينافسها
ولا للقلب يسبقها
وبعشقها
ومش عايز حبيب غيرها
ميلزمنيش
وبعشقها
ولو تجرحني بدعيلها
تدوم وتعيش
تدوم وتعيش
تدوم وتعيش
