قصيدة : آلووووو . للشاعر / أحمد الشافعي

حدّ يفهمها..

ان ” رصيدها ” خلاص بيقل..

و ان “كروت الشحن” الفاضية ..

على خط ” حكاوى “

مابتديش .. غير حاجة تعل ..

والحب على نظام ” سلفنى ” ..

خلّى القلب يمل..

حد يفهمها ..

ان “شريحة الخط ” اتحرقت..

واتمسحت منها

رسايلها المبعوتة ..

أيام ” العرض المجانى”..

وانه أنانى ..

اللى يفكر يبعت ” كلمنى “

و يستنى مكالمة

من ” الطرف التانى “

و خلاص ..

انا ح الغى نظام ب ” الثانية ” ..

واتحوّل ” دولى “

مش ح انظر خلفى خلاص ..

انا ح انظر حولى

مش ح اسمع تانى

الصوت الناعم

كل ما ارن عليها يقوللى:

” الهاتف مغلق ..

حاول فى وقت لاحق “