قصيدة . وشي اللى مليان خرابيش . للشاعر / ناصر دويدار

المليان خرابيش

أنا قلبي دافى

وصافي

متحوط صوف

ملفوف جرانين

علي قش

علي طبقة بلٌك!!!!!

و طبقة خيش !!!

كان صوتى العالي زمان

وزعيقى

علي حق

وعدل

وحكمة

طاروا بلاريش

كان زمن الطيش

ممكن أتخانق

علي بصه ماتعجبنيش

علي كلمه من واد هلفوت

أتريق علي لبس الجيش

في أجازة مركز تدريب

قبل التأيييف

ممكن أتعور ف خناقة

لعيل عاكس بنت

ماتعرفنيش

يااااااه

دلوقتى بخبي إيمانى

وبدفس صوتى ف صدرى

بدارى سبح الدرويش

علشان….

وسط الحشرات الطايرة

أعرف أعيش

ماتبصش علي وشي

المتكدر

البائس…العابس

واللي مكشر

أنا جوة في جسمى للجعانين

فرنة عيش