#بروفايلي بروفايلي لما الأهلي بيحقق بطولة أو يحقق فوز مهم باسمعُه بيضحك ويتنطط ويرقُص باسمعُه ع التليفونات ع الكمبيوترات القديمة واللَّابات ع التايم لاين النهاردة الصبح شوفتُه واقف بنفسه يوزع الشربات ................................................. شوفتُه كان لابس تي شيرت الأهلي ومعاه الحبايب كلهم واقفين يغنوا ف الشوارع ( أنا الأهلي اللي كان والحاضر أنا الإسم اللي هز جبال) شوفتهم والله فعلا مش خيال _ بالحبايب؟! _ بالحبايب مع إن بروفايلي الحزين.... مالهوش حبايب ................................................... بروفايلي لما الأهلي بيحقق بطولة بالمحُه وف عينُه دمعة لامعَة جدا واقفة نُص السكة بين الجفن والخدين وحايرة واقفة في حالة تردد ( دمعة جارحة؟ ولَّا فرحة)؟ يعني ممكن يبقى فيه بيني وبين الفرحة يوم ورقة مُصالحة؟!!! ....................................................... بروفايلي لما الأهلي بيحقق بطولة كل ما يبص ف مرايتُه ويلاقيه فرحان ما بيصدقش نفسُه _ مين سرقني من تفاصيلي الحزينة؟! هكذا بيقول لنفسُه _ هيَّ دي ( بوستاتي) فعلا؟؟ مفرداتي؟!! مين مغير لون حياتي من سواد كامل لأحمر ؟!!!! مين مخلي الفرحة جاية ف الليالي معايا تسهر؟! دا انتصار الأهلي خلَّى أزرق الفيس لونُه أحمر
