***************** سكت الكلام لما الكلاب ... هجمت على صف الولاد . عضت ونهشت لحمهم .... إيه ذنبهم ؟؟؟؟! ************** صرخ الوطن ... هاتوا الكفن ... انا كبدي لازم يندفن .... باحلف انا بترابي .... وبعزتي وشبابي ... لازم ادفعكوا التمن اياكِ يا ارض الهرم .... تخافي ... تميلي راسك ... ابنك شهيدك محترم مدفون باحساسك ... دمه بيحضن فـ العلم ... عاشق لأنفاسك ... ماتقوليش انا ابني مات .... ابنك بيضحك ع اللي قاتل .... الدم ده شربات ... بيروي ف سنابل .... بكرة حتبقى عود ... يعطرك كلك .. .والفرحة تاني تعود ... .لوردك و فلك ... يابلادي ليه تحزني ... شهدا وراحوا السما .... بكرة حناخد حقهم .... م اللي في عينه اتعما . الفار بيهرب في الجحور .... لما يشوف ريش الصقور .... وانت يابلادي لاعمرك ... خفت م الضلمة ولا سيل البحور .... اوعو تقولو بكره صلح .... اوعو تقولو فينا جرح ... اياك تقولو ان مصر حتسامح جبان .... لا عمره جاي ولاعمره كان ... عش الحمام مليان هديل .... والمُهر جوفه بيتكوى نازل صهيل ... والجندي عندي له دليل .... بيطلَع الشمسة قوية لو فـ ليل .... النور دا مصري ... الخير دا مصري ... حتى التاريخ من اوله ... حروفه مصري .... ماتقولوش انا ابني مات..... انا ابني عايش في الرمال ... دايب في حوض النيل ... مايغركوش منه السكات .... بعد صمته الف ويل ... التار ولو فوق السحاب .... احنا نجيبه .... وبعدها نقول ع اللي غاب .. غلطة طبيبه . ************* شعر / أمــــل فــــرج ***************
